حكايات ستي

b]قعدت جنب جدتى زى عادتى أسمع حكاويها الممتعة وأجمل مافيها انها كلها حكايات حقيقية لأشخاص حقيقين مازالت اسمائهم تتردد فى العائلة وفى البلد لغاية دلوقتى


ورغم أنها بتعيد كتير من حكايتها بس بقعد اسمعها تانى علشان احفظها أو يمكن تقول حاجة نسيتها وهى بتحكيها المرة الاولى وكانت بتقعد تقولى كمان فى كل مناسبة أبيات شعر حفظتها من جدى ، مش عارفة ان كان جدى فعلا شاعر ولا كان حافظ من الكتب القديمة
فى اليوم ده قالت لى حكاية أول مرة اشتروا فيها تلفزيون كانوا أول بيت فى الحى يدخلوه بيتهم وتانى يوم كانت قاعدة بتتفرج على مذيع فى برنامج بتسمع هو بيقول ايه لاقت أخوها الكبير دخل عليها بيزعق ايه اللى بتعمليه ده .. قاعدة بتتفرجى على راجل يا..... وشد سلك التلفزيون بعصبية ولم جه جدى عاتبه ازاى يشترى تلفزيون فى بيته بيجيب صور رجالة طول النهار وهو مش موجود
كان تصرفه فى الوقت ده مش من ناحية حرام وحلال وغض البصر والكلام ده بس ولكن كان الدافع الرئيسي هو الغيرة على أخته من صور الرجالة

والغريب ان اخوها عنده 95 سنة الآن ورغم كده ما دخلش التلفزيون بيته لغاية دلوقتى



كان متجوز واحدة من البلد أصغر منه بحوالى 12 سنة والرجالة فى الوقت ده كانوا بيتجوزوا بدرى أحيانا قبل ما يوصلوا للعشرين يعنى ماكانتش وصلت لل11 سنة ويمكن أقل كمان بس لغاية لما ماتت وهى عندها 48 سنة ماخرجتش بره البيت لوحدها ابدا وماشفتش تلفزيون خالص وماكنش عندها تليفون
كانت بتصحى الصبح زى بقية الستات زمان تعمل الفطار وتعمل الصابون فى البيت وتخبز العيش وتغسل على ايديها وترضع وتربى العيال ( أصل كان عندها 7عيال ورا بعض الفرق مابين كل عيل والتانى سنة ولا اتنين ) وتعمل الغدا بعد لما تدبح فرخة ولا بطة بأيديها من اللى كانت بتربيهم
فى البيت وتكنس وتمسح البيت ده غير طلباته لما يرجع من الشغل
ولما ماتت كان لسه عنده ستين سنة أولاده معظمهم اتجوزوا منهم اللى اخد دبلوم تجارة ومنهم اللى اخد بكالوريوس من جامعات الأزهر بس بناته ماخرجتش من البيت و كان بيجيب لهم شيخ فى البيت يحفظهم القرآن لما هو يكون موجود أو حد من أولاده الكبار أصل البنات ماكنتش بتقعد معاه كتير كان يدوبك مابين سن ال12 و15 سنة يجوزهم
وبعد موت مراته أولاده أصروا أنه يتجوز تانى علشان مايقعدش لوحده وفعلا اتجوز بنت عندها 18 سنة زى القمر والبنت كانت مبسوطة واهلها مبسوطين ان الشيخ سيد من عائلة "المسلمية " هايتجوز بنتهم وها تعيش معاه فى مصر لانهم كانوا عايشين فى البلد من غير عائلة
أصل البلد بتاعتنا مافيهاش غير خمس عائلات بس ومع الزمن لاقوا ناس جم يعيشوا معاهم من أماكن مايعرفوهاش اتجوزا وخلفوا بس ماحدش من الخمس عائلات كان بيرضى يتجوزهم علشان مايخدوش اسم العائلة لانهم كانوا بيقولوا عليهم دول ناس مالهومش أصل يبقى كانوا عاملين حاجة وحشة وهربوا من بلدهم أو من الحكومة أو ولاد حرام

أما عائلتنا فكانت عائلة بيحكوا عنها ان كلها مشايخ وولادهم مبروكين، قبر جدى الكبير من ناحية الأم مكتوب عليه شجرة العائلة وبيقولوا أننا من الأشراف يعنى من سلالة الرسول عليه الصلاة والسلام ولينا أكتر من واحد فى العائلة لما مات عملوا له مقام فى البلد
بس الله أعلم ان كان الكلام ده صح ولا زى ما عائلة بابا بتقول ان أجدادى من ناحية الأم كانوا بيضحكوا على الناس وبينصبوا عليهم وأقعد اضحك على كلامهم لأن العائلتين أصلهم عائلة واحدة يعنى ولاد عم وبينهم علاقة دم زى مابيقولواومهما كان اهو الواحد بيفرح أن عائلته ليها تاريخ ممكن نحكيه لولادنا .. نرجع للحكاية بقى ...ولما اتجوز البنت ديه خلف منها أربع عيال اتنين منهم اتولدوا بعد ما وصل لل70 سنة كان بيمشى فى الحارة وهو
عنده80 سنة وعيلين عندهم 9 و10 سنين ماسكين فى ديل جلبيته كأنهم ولاد أحفاده مش ولاده وأمهم كانت عايشة بنفس طريقة مراته الأولى بس كان مسموح لها انها تسمع اذاعة القران الكريم فى الراديو بس ولغاية دلوقتى عايشين مع بعض هى عندها 53 سنة وهو
عند ه 95 ولسه بيروح الدكان بتاعه كل يوم ساعتين ويقف يبيع بس بيقولوا ماحدش بيشترى منه لانه بيفتح بعد لما يصلى الفجر فى الجامع ويسبح لغاية الشروق ويقفل الساعة 7 الصبح وبعدين يفتح بعد صلاة العشاء ساعة كمان




بس اللى سمعته ان الولاد فى الحارة مش بيشتروا منه حاجة لان كل حاجته منتهية الصلاحية وماجبش بضاعة من يجى 3 سنين بس مراته وولاده بيقولوا انهم سايبينه يفتح الدكان كل يوم علشان هو بيبقى مبسوط لما بيعمل كدة


أحيانا كنت أمشى فى الشارع اللى فيه المحل بتاعه وألاقيه قاعد أروح أسلم عليه وأنا عارفة أنه مش شايفنى أوى ولا عارفنى من المية البيضاء اللى على عينيه الاتنين بس أقعد أفكره بيا أنا مى بنت فلانه وجدتى فلانه وجدى فلان


يقولى ازيك وازى امك وابوك وستك عاملة ايه ابقى قوليلها معلش مش قادر اروح لها أصلى مابقتش أعرف امشى زى الأول
أقوله حاضر يا عمو السيد بس ابقى خد بالك من نفسك وادعى لى
Posted by تائهة فى أرض الأحلام at 12:12 PM
8 comments:
صحفية روشة said...
انتى عامله زيى
انا بعشق بعشق حكايات جدتى وكلامها عن ايام زمان
بحس انه تراث واجب عليا حفظة يمكن اقدر انقل جزء منه لاولادى
ويا سلام عليها وهى بتقول انهم كانو بيجيبو السمنه فى طشوت(جمع طشت) كبيرة وكان بيجيبو الفاكهة بالقفص مش بالكيلو
واديها شايفة حالنا دلوقت بتقول اننا اتفقرنا والبلد باظت

March 17, 2008 6:44 PM
mohamed hesham said...
بوست حلو من حيث طرقة السرد والحكاية
ويا ستي ربنا يديله طولة العمر والصحة
.........
والسـ ختام ــلام

March 19, 2008 11:12 AM
Rain_Drops said...
أنا مش مصدق إن لسه فيه ناس بتقعد تسمع حكايات الجدات زيي ، كنت فاكر إني الوحيد اللي باقي في مصر عنده مرض الحنين إلى الماضي ، تيجو نعمل نادي نوستالجي و كل واحد يجمع فيه قصص الأجداد دي و أهو ويكأنه استثمار يعني؟

March 20, 2008 1:36 PM
micheal said...
حاسس أني قرأت البوست ده قبل كده


March 20, 2008 3:41 PM
تائهة فى أرض الأحلام said...
صحفية روشة

انا كمان كنت بسمع ماما وجدتى وهما بيقولوا انهم كانوا بياكلوا زمان كتير اوى ويمكن ياكلوا قالب سمنة بلدى مع حتة عيش
وكانوا بيبجيبوا برده الفاكهة بالاقفاص بس هما كانوا عايشين 8 فى بيت واحد

اكيد حياتهم كانت احلى

March 23, 2008 4:36 PM
تائهة فى أرض الأحلام said...
محمد هشام

اهلا بيك فى مدونتى واتمنى انك تزورها دائما

March 23, 2008 4:36 PM
تائهة فى أرض الأحلام said...
rain drops

أنا موافقاك على الفكر اعمل البلوج وانا عندى يجى 100 حكاية اقولها
لانى انا كمان عندى مرض الحنين الى الماضى

March 23, 2008 4:38 PM
تائهة فى أرض الأحلام said...
مشيل

اكيد ما انا كنت حاطاه قبل النكسة
اللى حصلت فى مدونتى
اتمنى اشوفك فى البوست الجاى

March 23, 2008 4:38 PM
Post a Comment

Links to this post
Create a Link

Newer Post Older Post Home
Subscribe to: Post Comments (Atom) لا اله إلا الله الحليم الكريم .... لا اله إلا الله العلى العظيم .... لا اله إلا الله رب السماوات السبع ورب العرش العظيم


أكيد لسه بحبك يابلدى


مشكلتى يا سيدى إنى مخلوق من العشق .. عاشق للمثال .. ظمأ لا يرتوى .. جوع لا يشبع للحب والجمال

عليك بأن ترسم أهدافا عالية - على مستوى الإنسانية - وتبتعد عن الأهداف الأنانية التافهة قصيرة الأمد ، فلا تحلم بقطعة سكر فانية لكن أحلم بقطعة الألماس الباقية

About Me

تائهة فى أرض الأحلام
أريد أن أسجل تجاربى الشخصية التى حدثت على أرض مصر مصر التى أعشقها وأحزن لانى أراها الآن مجرد ساحة كبيرة عليها 70 مليون مواطن كل واحد فيهم يختلف مع الآخر فى صراع عجيب لا أعلم كيف سينتهى خاصة وان كل فرد لايرى هدفه وطريقه بوضوح وكأن شبورة مائية تسيطر على جميع الأجواء المصرية فأنا أفولها وبكل ثقة ====> لا يوجد مواطن مصرى الآن يعرف ماذا يريد أو لماذا يعيش بل كل مافى الأمر أنه يترك نفسه لتيارات متضاربة تحت ضغوط مادية واجتماعية يصنعها بنفسه وسيجنى حصادها المر قريبا حين يعرف أنه لم يكن هناك سبب يستحق كل هذا العناء وكل هذا التشتت
View my complete profile




Blog Archive
▼ 2008 (29)
▼ October (2)
الحب من تل أبيب - 1
من تراث العشق والهوى ورحلة البحث عن الحب
► September (1)
كلام مايهمش حد
► August (2)
هدنة مع النفس
عشر رجال لا يصلحون للزواج
► July (4)
مأسآة أخرى من مآسى الحياة
مأسآة الموسم
ياترى هو احنا اللى بنهين لفظ الجلالة ولا هما ؟
حالة تفكير
► June (1)
خصخصة الاسعاف المصرى
► April (2)
ياترى مين هى الحكومة الجاية ؟
وقفة تأمل
► March (9)
عايزة أرجع لأصلى
قال ايه !! ..أنا مش مزة
اللعنة علينا فى مصر
حكايات
ياترى أنت كمان جاهز للتطبيع ..؟؟؟؟
أحذر المعاكسة بالمحمول‏
عبث فكرى
نفوس فى الظلام
لحظات من الصمت
► February (7)
ياريت مصر ترجع حلوة دخلت أكتب هذا البوسط بعد لفة...
الرأسمالية الوطنية .. هل تشعر المواطن بالأمان ؟؟؟أ...
شارع ببيه واه بدون صور منعا للاحراج هذا الشارع الم...
مخنوقة
رقصة الحرام
هيا بنا نمصر الأمريكان
كارثة ... كبيرة
► January (1)
صناعة الرسوم المتحركة فى مصر مازال الكثيرون...
مدونات صديقة
وجه جديد
خالو أحمد الصباغ
أنا وأنا
أسامة يس
دكتور حر
مدونة مايكل
عبدو باشا
أبو العربى
حكاوى آخر الليل
انكسارات
مجرد انسان .. محمد عبد العاطى
ِشفيقة ومتولى
[/b]