قمر الليالي كوول مشارك
عدد الرسائل : 31 العمر : 30 الموقع : لا يوجد تاريخ التسجيل : 03/11/2008
| موضوع: حكاية ستي رسمية السبت نوفمبر 08, 2008 5:48 am | |
| ]ستى رسميه
بدي يا حبايب يا عسل أحكيكم حكاية ستي رسميه ، وهاد مو إسمها الحقيقي ، هادا إسم
الشهره عندنا في الحاره ، ومين في الحاره ما يعرف ستي رسميه ، وهيا ست من الكبار في
السن ، يقولو إن عمرها ميه وتناتيش ، لكنها من الستات إللي يعرفو كيف يحافظو على نفسهم ،
رشقيه وسريعة الحركه ، ولا بنت اربعطعشر ، دفنت رجالين وما خلفت ، لكن كل أهل الحاره أولادها
وبناتها ، وستي رسميه هادي من عجائب الزمان ومدرسه جامعه يتعلم منها الكبار قبل الصغار ،
تعرف في التفسير والحديث واللغه ، ولا تسأل عن معرفتها بالشعر والأمتال الفصحي والعاميه وحتى
هرجها بترتيب وعقل وكلمه كلمه ، عمري ما سمعتها تزعق ، اصلو أول بختها كان راجل من علماء
الحرم المكي الشريف ، أيام ما كان الحرم الشريف جامعه يتعلمو فيها الكبار والصغار كل أنواع العلوم
وكانو المشايخ على مستوى موسوعي في المذاهب والأدب واللغة ، والحديث عنهم يطول ، هادا
غير الزايرين من علماء بره ، كان العلم في الحرم حاجه تفرح القلب و تبيض الوش ، والحديث عنهم
يطول قصره لا أكتر عليكم .
ويّ ايش بنا رح ننسى ستي رسميه وحكايتها و لا أيه ، لما كبرت أنا شويه و فزيت عرفت إنو
ستي رسميه مو هادا إسمها ، لكن جاها هادا الإسم من حبها للرسميات ، وتبغى كل شي على
تمامو ، يعني تعتني بالإتيكيت عنايه ما بعدها ، بيتها زي المرايه ، نضافه وترتيب وكل شي في
محله ، وكإنها مهندسه ، وكل فصل في السنه يتغير ترتيب البيت ، والمنجد يجي ينجد لها الطرّاحه , والطرّاحه هادي زي الليانه بس أوسع شويه ومخصصه للنوم ، وعندها ناموسيّه للصيف
وتانيه للشتا ، وبنات وحريم الحاره يخدمو معاها وبالنوبه ، ويتضاربو لو وحده أخدت سِرا التانيه ،
وببلاش غير صحن المعدوس إللي يتربعو عليه مع الحوت الناشف وزلطة الحمر وحزمة الكرات ، وكل
وحده من البنات والستات تتحدث عن داكا الشرف إللي اسبغتو عليها ستي رسميه .
وستي رسميه لها كمان نظام خاص في اللبس والتقيين ، والتقيين يعني " المكياج " وهوا شغلة
المقينه ، فالمحرمه والمدوره اليشمك ما تفارق راسها ، ولما تخرج لأي واجب لازم تكون في كامل
الزينه متكحله وداهكتها والسديريه المشتغله ، وازارير الذهب إللي تنتهي إما يحوته ذهب أو جنيه
أفربجي والكرته هاديكا إللي عليها الكلام آخر موديل والتليك المشتغل والسروال الحلبي ، كل شي
كإنو خارج من تحت المكوى ، ولما تبغى تلبس المصكك أو الزبون ، لازم وحده ست من الجيران
تجي علشان تساعدها في اللبس ، وعمري ما شفتها تلبس الجامه ، والجامه هادي زي إللي
يلبسوها بعض النسا الأفغانيات ، لها فتحه على قد العينين وعليها شبك من القماش ، وستي
رسميه يا إما تلبس الملايا التركي ، وهادي ولا تزال تلبس في سوريا وتركيا وهي من قطعتين ، أو
تلبس القنعه ، والقنعه هادي كنا ونحنا صغار نشرد من لابستها ، لأن شكلها يصير زي الغوله ،
وستى رسميه ما تلبس القنعه إلاإذا كانت في مناسبه على مستوى ، وهادي الحكايه ، ورحمو
معايا على ستي رسميه ، ومساكم زي الفل[/size]
| |
|
همس المشاعر كوول برونزي
عدد الرسائل : 164 العمر : 31 تاريخ التسجيل : 01/11/2008
| موضوع: رد: حكاية ستي رسمية الإثنين نوفمبر 10, 2008 12:36 pm | |
| هههه ههه والله شئ بيجنن مشكووور كتير كتير على الموضوع الممسز | |
|
بنت الجيران المدير
عدد الرسائل : 146 العمر : 30 تاريخ التسجيل : 18/07/2008
| موضوع: رد: حكاية ستي رسمية السبت نوفمبر 22, 2008 10:16 am | |
| شكرا كتتتير وسلمي كمان على ستك رسمية | |
|